चंडभानुकलशं विधित्सुना दंड एष विनिवेशित: किल ॥
बालशीतकिरणच्छलाच्चलत्कालचक्रशिखरे विराजते ॥१८७॥
सांध्यरागदहनद्रवीभवन्नव्यशीतकररौप्ययष्टिकां ॥
कंकणाय विधिरुक्मकारक: संदधेस्तगिरिकूटमस्तके ॥१८८॥

रभसान्नभस: पथि त्रुटद्रथनेमि: पतितास्ति भानवी ॥
अभिनव्यनिशाकरभ्रमं कुरुते सैव जनस्य पश्यत: ॥१८९॥
पृतनानृपते र्मनोभुव: स्थितिमत्रैव परां करिष्यते ॥
प्रतिपच्छशलांछनछलाद्वलकेतु; किल कीलितो यत: ॥१९०॥
मलिनं मदनास्त्रजालकं विमलं कर्तुमिवासिधावनीं ॥
अभिनव्यकलानिधिछलाद् जगृहेसौ विधिशास्त्रमार्जक: ॥१९१॥
प्रतिपच्छशभृच्छलाकिकामुडुमुक्ताफलकानि रंध्रितुं ॥
विदधे नु वियन्महोदधे: सविधेसौ विधिरत्नवेधक: ॥१९२॥
कंदंर्पस्तारकै: पुष्पै: कुर्वन् विष्णुपदार्चनं ॥
बालचंद्रछलादेकं केतकं समयोजयत् ॥१९३॥
सुधादिग्ध मनंगेन क्षिप्तं पापर्ध्दिकारिणा ॥
नव्येंदुदंभसंरंभात् पुष्करं मच्छवेधनं ॥१९४॥
वारुणीसेवनोन्मत्तनीलांबर मुपक्षिपन् ॥
नमो यमश्वसारं नु क्रष्टुं बालेंदुलांगल: ॥१९५॥
मन्येनंगशिशो: कंठे दुष्टदृष्टिनिबर्हणं ॥
बालचंद्रछलान्नध्दं वैय्याघ्रं विधिना नखं ॥१९६॥
समुल्लसव्द्योमपटांतरेस्मिन् ताराक्षरौर्मन्मथभूपलेखं ॥
लिखन् विधिर्धीसचिवो नु चक्रे वक्त्रेंदुदंभा न्निजचिन्हमंते ॥१९७॥

एवं समुज्जृम्भमाणे प्रतिपच्छशलांछने समंतत: समुपजातोत्कंठौ राधामाधवौ मन्मथकेलीलालसौ लीलामंदिरमविंदताम् ॥श्री:॥

॥इति श्रीमज्जयरामकविविरचिते राधामाधवविलासे चंद्रोदयसूर्यास्तमयवर्णनं नाम पञ्चमोल्लास:॥५॥