पंचमोल्लास:

अथ कदाचन भगवति नंदनंदने तया दयितया सह विहरमाणे भगवति मयूखमालिनि तदाराधनायेव विरत्नरत्नजात माहर्त्तु पश्चिमपारावार-गांभीर्यावलोकनेच्छया पूर्वमपरगिरिगंडशैल मुद्दंडरश्मिमिव बध्दं विदधति तदनु मधुसूदनवदनशोभापराजितोपि तत्र स्ववशांकुरकृतमिदमित्यनुसंधाय तदवलोकनलालस श्चक्रवाकविलासिनीविरहानलज्वालापटलपरीत इवारक्तमंडलो विरहिजनमानसमोहनाय शंबरारातिसमासादित इव दिव्यास्त्रतेज:पुंज: यामिनीकामिनीकरकमलकलितकमनीयमिव कोकनदं शृंगाररस इव शरीरधारी दिङ्मंडलाक्रमणचंक्रमणशीलस्य मदनमहीपते: प्रस्थान समयसमुचितसंध्याविलासिनीपाणिपंकजसमासादितपीयूषलक्ष्मछलदधिदूर्वा - पूरितराजतभाजनं गगनविपिनतारकानिकरगोकुलपरिपालनं कुर्वता संध्यारागा रुणित - निजमंडलतया कंसपरिस्थापितचाणूरमुष्टिकपुष्टतरशरीरं एकमुष्टिघातेन पिष्टप्राय मभिकर्त्तु मभिलषतो र्मल्लयुध्दाभ्यसनायाप्रतिद्वंद्वतया रंगभूपरिसरपरस्परपरिकल्पित करचरणावरणकुंडलीमंडलयो: संकर्षणकृष्णयो र्लक्ष्मी माविष्कुर्वाण: सुरवर्त्मकुरुक्षेत्रे नक्षत्रक्षत्रियकुलोभयपक्षात् सप्तसप्तिसंशयप्तकपतिना समराय समाकूतयोरिव तदभिमुखं माधवमानयो: कल्पितचंदनस्यंदनयो: पांडुनंदननंदनदनयो: श्रिय माश्रयमाण: त्रिभुवनमेकेनैव पणेन विजेतुकामेन कामेन पणार्थिनी दशदिक्विपणिकामध्ये निक्षिप्तस्य नीलांबरस्योपरि परित: प्रसारितोडुगणमुक्तानिकरस्य परिधिकैतवकांस्य-पात्रांतर्निहितकलंकले रवलांछितगजदंतविहिताक्षस्य बधुतां दधान: पूर्वोत्तरकाष्टा-वेष्टितत्रिविष्टपतदीयवनतंतुभि र्भवने विजेत्रे मदनमहाराजायोपहारीकर्त्तु किमपि विज्ञप्तुकामेन विधितंतुवायेन विरचितस्य नीलिरागरंजितमध्यस्य संध्यारागारुणितपल्लवद्वयस्य तारकारजतबिंदुलांछितस्याबरस्य कुत्रचिदपूर्णस्य पुनरपि रंजनायानीतंस्फाटिकं नीलीभाजनमिति धियं जनानां जनयन् मनसिजनरपतिगुणगणगणनाय विधिविरचितोडुकुलमुक्ताफलमालाया इव मेरुमणि: यावद्दिन मतिखरतरदिनकरकर निकरसंपातसमुत्पादितसंतापा: कुमुदिनीकुटुंबिनी: कराभिमर्षेण निकृतविषादा: समादधान: पीयूषपिपासाकुलचकोरनिकरचंचुपुटतटकुट्टनसंजातव्रणकिणेनेव कलंकेनांकित: अपरत्र स्वसाम्यमसहहमान इव राधावदनेंदो: कांतिसर्वस्वापहरणाय करप्रकरमभित: प्रसार्यमाण: ब्रह्मभुवना न्नंदनवनहरिचंदनस्कंधगतचंद्रकिंध कारनीरक्षीरपरीक्षाचंचुर श्चमत्कारव्यत्यासेन कलंकछला ज्जल मापीय ज्योत्स्नाक्षीर मुत्सारितवानित द्विजराजहंस: सकललोकलोचनचंचरीकनिचयस्य कुसुमस्तवका मुच्चाय्यमान: समुदंचति शशलांछन: ॥ तदनंतर मिंद्रजालिक इव कश्चन कालोपि कौतुकलालसयो स्तयो र्निकुंजगतयो श्चमत्कारानिवादर्शयन्नाविर्बभूव ॥ तथाहि ।
कालेंद्रजालिकक्षिप्त: पारावतविधित्सया ॥
प्रतिपच्चंद्रदंभेन पक्षो व्योमकरंडके ॥१७३॥