तथाहि ।
दोषाकरकरै: स्पष्ट: पूर्वापरपथे चरन् ॥
कुर्तुं दक्षिणतीर्थानि मार्गेसौ याति भास्कर: ॥१६१॥
कामिनीकरपद्मानां रक्षणाय हिमागमे ॥
भानुना भानुभि र्मन्ये बृहद्भानुरयं कृत: ॥१६२॥
भानुना स्वकरै: क्रूरै र्हिमवान् द्रावित: पुरा ॥
हिमानीतेन सेनेयं प्रेरितास्य पलायते ॥१६३॥
कलावंतं समासाद्य हेमंतेन पराजित: ॥
मन्येहं दस्युतातत्वा दत्यर्थं हीयते रवि: ॥१६४॥
कन्याकुमारिकाया वेषं प्रविधाय भानुना दृष्ट: ॥
पारदरूपो हिमवान् धावति पृष्ठे परिस्खलन् तस्या: ॥१६५॥
परिक्षीणो दृष्टो दिनपति रकांडे क्षणदया ॥
कृता हेमंतर्त्तौ परिणतमृगांकस्य कृपिका ॥
तया दृष्टा पुष्टि: प्रथममधिका स्वीयवपुष: ॥
ततो दातुं मन्ये मकरजमुहूर्तं मृगयते ॥१६६॥

एवं हेमंतमन्मथमतंगजेन त्रोटितशरन्निगडेन लोडितजलाशयेन मोटितकमलानिलयेन प्रकंपितजनपदसमुदायेन परित: फूत्कारनि:सारितकरशीकरेण करेणो रैरावणस्य स्पर्शलिप्सया घनीकृतगगनगंगाप्रवाहसोपानेनोज्जृभितं यदीयापूर्वदर्शनभयेन भानो स्तुरंगमा हृन्वर्थनामानो बभूवु: तानिव कांदिशीकाशिशिरोपायेन सांत्वयन् परावर्त्तयितुं शिशरर्त्तु: प्रावर्त्तत ॥