अहमंकशैलधारणादभजं प्राक्सकलातिशायितां ॥
कुचशैलयुगं बिभर्मि चेत्पृथुलं ते मम कीर्ति रस्तु का ॥४६॥
वर्ण्यौ कुचौ द्वावपि यत्तवेमौ श्लेषो भवत्येतदलंकृति स्तत् ॥
अर्धा विमौ चेत् परिगृह्य चारु प्रमोदते सद्रसिक: फलं तत् ॥४७॥
राधे तुल्ये मूल्ये विलसति नौ हारयो र्वर: कतर: ॥
हरि रवलोकनदंभादिति कुचकुंभा वहो स्पृशति ॥४८॥
इति ब्रुवन्नेव कुचौ दधार समालिलिंगापि बलाच्चलास्यां ॥
मामेति खंडोदित मीरयित्वा सा चाभजत् पारवशी मवस्थां ॥४९॥
मृदुलं हृदयं रमापते: कठिनौ चापि कुचौ मृगीदृश: ॥
विशतां न कथं नु ताविद सुदृढालिंगनत स्तदाननात् ॥५०॥
दृढपरिरभादेतौ न कथं दलितौ स्तनौ तन्व्या: ॥
यदि वा विधुरौ जातौ न पुनरभोजकुड्मलौ कांतौ ॥५१॥
राधाप्रिय: सोयमथा रराध नीवीविमोक्षाय मतंगजास्यं ॥
पीतांबराश्लेषमये विहाय श्वेतांबरं नार्ह मिद तवेति ॥५२॥
हृद्ग्रंथिभेदेप्यतिदुष्करे य: प्रगल्भते चारुदृशां सुखाय ॥
का मुग्धदृष्टे र्मृदुनीविबंधविमोचने दुष्करता नु तस्य ॥५३॥
गलद्दुकूलं स्फुट मुरुमूलं विशृंखलं पश्यति गोपवाले ॥
समातनोत्संहत मूरुयुग्मं न्यमीलयच्चापि विलोचने सा ॥५४॥
कपोतनादै र्भणितै श्च मुग्धै रनश्रुजातै रुदितै: प्रभूतै: ॥
निर्भर्त्तनै र्मंथरहासगर्भै रतोत्सवोऽभूदनुभूतपूर्व: ॥५५॥
ततो बभूव प्रसवास्त्रयुध्द मगोचरं यद्वचसा ममंदं ॥
जानाति तन्नून मनंग एव प्रवर्तय न्बाणगणप्रयोगं ॥५६॥

एवमक्षीकृतवात्स्यायनतंत्रसर्वस्वो भगवानतिवेलं बालिकामिमां रमयित्वा तदनु तदीयनिरतिशयपतिवाल्लभ्यसंभवदवष्टंभसंभारविघटनाय यशोदादारक: समनंतर मंतरधात् ॥
जयरामकवि: कवींद्रमान्यं श्रुतसाहित्यसुधाब्धिसेतुभूतं ॥
तनुतेतितरां महाप्रबंधं श्रितराधामुखवैरिकेलिजालं ॥५७॥

॥श्री॥ ॥इति श्रीमज्जयरामकविरचिते राधामाधवविलासे चंपूकाव्ये पुष्पशय्यारिरंसा नाम द्वितीय उल्लास: ॥२॥