द्वितीय उल्लास:

अथ कदाचिदुन्मीलितकमनीयसकलकमलकांतिसर्वस्वपश्यतोहरीभूय तद्भयेनेव नरवरकै तवकुमुदबांधवसंबंधजुषा चरणयुगलेनालंकृत: सदृशवस्त्वंतरालाभेन परस्परमेवोपमानभावजुषा सक्थियुगलेन लोभनीय: चतुर्दशभुवनसर्गोपसंहारयो र्निर्गप्रवेशद्वारेणेव नाभिकुहरेण शोभमानो गर्भीकृताखिलब्रह्मांडमपि लघुतरमुदरं बिभ्राण: परित: कमनीयमुक्ताहार वलयितकौस्तुभमणिशोभिततया तारकानिशाकरव्यतिकरितेनांतरिक्षेणेव वक्षसोपलक्षित: कल्पवृक्षलतायुगलेनेव बाहुयुगलेन समुल्लसित: संतानादित्रिदशतरुशाखापचकनिर्मितयेव पंचशाखपदाभिधेयेन करपंकजेन विराजमान: स्कंधधृतसुकृतभारतयेव वृषस्कंध इत्यभिधानमादधान: लोचनाव्हयमनियुगलस्याधराख्यप्रवालस्य दशनमुक्ताकलापस्य नासिकाभिधोघ्दुरनिर्मितसेतो रप्यास्पदीभूतेन वदननाम्ना सौंदर्यसागरेण विभासमान: चिकुरनिकरांधकारनिगूढेन चंद्रमंडलत्विण्मंदिरपटुकपाटपट्टिकापाटच्चरेण ललाटेनातिसौष्ठव मातन्वानो नंदनंदन: कुसुमसायकस्य जगद्विजयवैजयंतिकामिव त्रिजगन्मोहनमहौषधिमिवाचिंत्यशक्तिमिव कनकतरवारिमिव वशीकरणमणिमिव सिध्दमंत्राधिदेवतामिव राधा मुदंचितयौवना मसहायतया यमुनापरिसरारामपथा संचरमाणा मक्षिलक्षीचकार । तदानीं स्वगतमेवमचिंतयच्च । केयं कर्पूरकुंकुमकेसररज:पुंजरचित–पुस्तस्त्रीतनुरिव मनोहरपरिमलधारिणी शुक्लपक्षप्रतिपच्चंद्रलेखेवापूर्वांबरावृतशरीरा शारदसरोवरशोभेव परिकलितकमलमालाललितपयोधरा वसंतलक्ष्मीरिव कुसुमहाससरसा शंकरमूर्तिरिव हरिणशरीरधारणनिपुणा सत्कविकाव्यरचनेव सुवर्णालंकृता पत्रवल्लिविचित्रितगात्रयष्टि रप्यपर्णांगलावण्यरुचिरतरा जलनिधिनंदिनीव पुंडरीकाक्षमनोहारिणी पीयूषवर्तिरिव पुरोवर्तिनी मम चक्षु राप्यायतति । भवतु । या काचिद् व्रजनिवासिनीति तु नि:संशयं ।
बालेय मनुकूला चेदिंदीवरविलोचना ॥
अस्तु दूरे ममाखंड माखंडलपदे सुखं ॥३४॥
इत्थं विचिंतयति पंकजलोचने सा । बाला विलोचनपथातिथि मादधे तं ॥
आकांक्षति स्म च मनोजविनोदभावं । सान्निध्य मेव सुदृशो र्घटनस्य हेतु: ॥३५॥
तदनु मंदंमंदं मुकुंद: कंदर्पवचननोदित इव तदीयहृदयपरिशीलनाय समीप मुपससर्प अवादीच्च ।
बालै ललाटंतपघर्म्मरश्मौ । वने विहारोऽत्र शिरीषमृद्वया: ॥
न शोभते कारणमत्र ननूं । अवश्यलभ्या कुसुमेषुकेलि: ॥३६॥