[५४]                                                                               श्री.                                                                             ८ जुलै १७९५.

विनंति विज्ञापना. नवाबानीं येथून मुसारेमू यास अघाडीस त्याचें जमीयतसुद्धां रवाना केलें. घासीमिया व महमद आजीमखान या उभयतांसही रुखसतीचीं पानदानें दिलीं. छ १७ रोजीं त्याचे डेरे गोवर्धनाचे बागेपाशीं झाले. छ १९ रोजीं उभयतां निरोप घेऊन डेरे दाखल झाले. पागा चरईस आहेत, त्यांस बोलावणीं गेलीं आहेत. येथें थोडेबहुत लोक त्यांसहित बाहेर निघून इसामिया व जोतसिंगखंदारकर व सुभानखान रोषनखानाचा भाऊ वगैरे सरदारांची नेमणूक झाली. सर्वत्रांचे लोक तालुक्यांत आहेत, तेथून आणविले. आल्यानंतर जमा होतील. र।। छ २० जिल्हेज. हे विज्ञापना.