ननु मुग्धाप्रतारणे कठिन मस्तीति गोपीभि रुपहसित: श्रीकृष्णदेव: प्रौढायामपि प्रतारणं कृतवां स्तद्यथा ॥कदाचिदसौ अष्टमीभूर्गोष्ठ मधितिष्ठंतीं दधिमंथनघमघमायमानघनगर्जितव्यतिकरनर्त्तितविद्युन्नटीविरचितारभटीं तिर्यग्वर्तितत्रिकतटीं कंठविनिर्जितकलकंठीं बिंबोष्ठीं अतिसौष्टववल्गत्कुचघटीं गोपवधूटीं दृष्ट्वा करटिकरटतटविपाटनोत्कंठित- कंठीरवकिशोरक इव निष्कपटकंचुकितचेष्टाभि रेवमाचष्टे ।
गोमक्षिकां बत - - भुजांतरेऽस्मिन्
गृण्हामि निश्चलतयाऽशु पिधेहि कर्णौ ॥
इत्थं घटप्रतिभटे हृदि य श्चपेटां
कुर्वन् हरि: करिगते र्जयति स्म गोष्ठे ॥१८॥
कदाचिज्जलक्रीडालालसो यमुनातीर मगमत् । तत्र च
कूले निक्षिप्य वासांस्युपगतयमुनावारिधाराविहारं।
वृंदं विद्युल्लताना मिव हरिणदृशां विस्मया द्वीक्ष्य शौरि: ॥
एकैकां वीक्ष्य नग्नां रहसि युवजनो मन्यते धन्य मत्र
स्वात्मानं हंत सर्व्वा: किमुत कलय नो धन्यते त्युल्ललास ॥१९॥

तदनु यदुनंदन: कूलनिक्षिप्तं तदीयदुकूलजाल मपहृत्य निरुपमगोपरूपसंपत्तिरनूपसमीपनीपपादपशिखर मारुरोह ।
ता श्च शीतभरवेपिता स्तत: कूलदत्तनयना मृगीदृश:
चैलजाल मनवेक्ष्य विस्मिता माधवं तरुगतं व्यलोकयन् ॥२०॥
चक्रे तदैव यमुनानिजनीरपूरनैर्मल्यतो यदुपते र्नयनोपकारं ॥
येनांतरे किमु करे कचकोश मासां कर्तुं हरि: प्रतिशरीरतयाऽविरासीत् ॥ २१ ॥
अत्रांतरे कुसुमबाणकलारहस्यसर्वस्वनिर्भरजुषां वरवर्णिनीनां ॥
मंदोदिताननविवर्त्तपरस्परेक्षागूढस्मितानि हरिनेत्रफलत्व मापु: ॥२२॥
तदनु ततस्ततोऽ नुगता स्ता व्रजवनिता जलदेवता इव धीवरजालपरिकल-नेनैकत्रमिलिता यदुनंदन मेवं व्यजिज्ञपन् ॥ अये करुणानिधान यशोदानंदन ॥
दास्यो भवाम तव देव यथोदितार्थ -
संपादिका यदि ददासि दुकूलजालं ॥
किंवा बहूक्तिभि रमी पदपंकजे ते
बालारुणारुणरुचौ रचिता: प्रणामा: ॥२३॥
परवत्यो वयं बाला स्त्वं चाल्पेदितयौवन: ॥
न शोभते तदास्माकं प्रकटोयं समागम: ॥२४॥