पत्रांक १९५

श्री.
१७०० आश्विन शुद्ध ६

राजश्री महिपतराव साठे गोसावी यांसीः-

अखंडितलक्ष्मीअलंकृतं राजमान्य स्नों माहादजी शिंदे दंडवत विनंति उपरी येथील कुशल जाणून स्वकीय कुशल लिहित जावें. विशेष. तुह्मीं पत्र पाठविलें तें पावलें व श्रीविश्वेश्वराचा प्रसाद पितांबर पाठविला तो राजश्री माधवराव गंगाधर यांणीं पावता केला. श्रीचा प्रसाद पावोन संतोष जाहले. आपण इकडे येऊन भेटून जावें, ह्मणून लिहिलें होतें; परंतु, योग न घडला, परभारें जाणें जाहलें. महेश्वराहून पुढें जावयासी निघणें जाहलेंच असेल. स्वस्तिक्षेम पुण्यास पावल्याचें लेहून कळवावें. र ।। छ४ रमजान. बहुत काय लिहिणे ? हे विनंती. मोर्तब सुद.