इ : एमि इत्यादी रूपे यङ्लुकचे संक्षेप आहेत. लुङ् व लिट् यात इ चे काम गा करतो. म्हणजे हा लंगडा धातू आहे. लंगड्या धातूंसंबंधाने विवेचन दाही गणांचे विवेचन झाल्यावर शेवटी एकदम करणे सोयीचे आहे.

तात्पर्य, अदादि गणातही बहुतेक सर्व धातू यङ्लुक्चे व काही लिट् चे संक्षेप आहेत. भ्वादीत व अदादीत भेद इतकाच की भ्वादीत आमि, आव:, आम: इत्यादी अजादि सर्वनामे धातूंपुढे लागतात व अदादि गणात मि, व:, म: इत्यादी हलादि सर्वनामे धातूंपुढे लागतात. या धातूंना पाणिनी लुग्विकरण म्हणजे ज्यांना विकरण नाही ते धातू हे नाव देतो. अदादीतील अद्, अन्, अक्ष् यांच्या लङ् च्या आद: आदत् आन:, आनत् इत्यादी रूपात अजादि सर्वनामे धातूंना लागलेली आढळतात.

५६ (३) जुहोत्यादि धातू : हा वर्ग बोलूनचालूनच अभ्यस्त आहे. तेव्हा यातील धातूंच्या साधेपणाचा प्रश्नच निघत नाही. यांना श्लुविकरण अशी पाणिनीय संज्ञा आहे. याची अंगे लिटांतली आहेत.