चतुर्थ उल्लास:

अथ कदाचन तया दयितया सह वनविहारसादरं यदुनंदन मुपतिष्ठासु र्मलयशैलवेलावनकेलिलालसबिलेशयविलासिनीशिथिलधम्मिल्लसंफुल्लमल्लिकापरिमलमांसलै: कलिंदनंदननीलकल्लोलमाला वेल्लनसंजातनिरंतरशिशिरसीकरशेखरै: वनदेवतालतावितानखेलाखेलनमत्सव-दानसमुत्सुकै: मंदंमंदं अरविंदवृंदस्पंद- मानमकरंदबिंदुसंदोहचुंबिभि: समंतत: क्षुधितदंदशूकभयादिव शनै: शनै रापतद्भि र्बालानिलै रुपलालित: सहकारकुसुमनिरंतरविसरदास वासारसारस मास्वादनक्षीबरोलंबझंकारपारंपरी परिचयविरचितनिजागमनपिशुन मंगल-तूर्यनिनदाडंबर: सर्वतो विविधकुसुमसमुदयसंबर्द्धनेन मधुकरनिकराणां मधुव्रतनामधेय मन्वर्थं मादधान: पथिक जनहृदयवारणांकुशै रिव पलाशमुकुलै ररुणीकृताखि-लकांतारांतर: समंततो वसंतसमय: समजृंभत ॥
अपिच
भृंगारवापूरितकर्णिकारै: प्रस्थानबाधं विदधेग्रतोस्य ॥
मंदानिलांदोलनलोलपत्रै स्तालत्व मंगीक्रियत स्म तालै: ॥१०७॥
तदीययानाय तुरंगमोसौ प्रकंपन: षट्पददामनध्द: ॥
पार्श्वे यदीये भृतमंजरीभि र्निषंगता माभ्रतरु: प्रपंदे ॥१०८॥
नानानगै र्भंडितकाननश्री र्गृहीतपूगीफलनारिकेलि:॥
पद्मानना स्वच्छसुमच्छलेन दध्यन्विता तच्छकुनाय तस्थौ ॥१०९॥
पुरोस्य वाहै रिव गंधवाहै: समुध्दतो दिक्षु विदिक्षु रेणु: ॥
वियोगिवर्गै रिति मन्यते स्म धूलीकदंबोत्थितधूलि रेव ॥११०॥
उत्तंसितं नूतनमंजिरीभि र्वसंतरागारुणितं रसालं ॥
कलं समालोक्य मुदानुवेलं वाणी मभाणी द्रुणिवत्पिकापि ॥१११॥
यत्रोत्तमश्लोकविलोकनेन न चित्रता कोकिलकाकलीनां ॥
श्लोकं पुरा केवल माकलय्य वल्मीकजन्मा यदभूत् कवींद्र ॥११२॥
दशावतारे वनमालयोच्चै र्विराजमानो ननु माधवोसौ ॥
राधानुकारा मिह माधवीं स्वां कुंजे निलीना मवलोकते स्म ॥११३॥
पत्राकुलोसौ बकुल: समंतात्तलस्थले शीतलतां दधान: ॥
पतत्प्रसूनै र्मकरध्वजाय तल्पं समाकल्पयतीति मन्ये ॥११४॥
विचित्रपत्रेष्विति चित्रकाव्यं पुष्पाक्षरं दर्पकभूमिपस्य ॥
वंशावले र्भृंगरवच्छलेन वैतालिकाग्रेतिलक: पपाठ ॥११५॥