श्री
भाद्रपद शु. ८ शुक्रवार शके १७१५.

विनंती विज्ञापना. चेनापटणाहुन व्यंकटरामदीला याजकडील अखबार सांप्रत आली ती येथून र॥ केली आहे. राजश्री गोविंदराव भगवंत सेवेसीं प्रविष्ट करतील, त्यावरून वर्तमान अवलोकनांत येईल. उत्तर रवाना होण्यास आज्ञा जाली पाहिजे. रा छ ६ माहे सफर हे विज्ञापना.

श्री.
अखबार ई छ. २५ मोहरम ता छ ९ माहे सफरपर्यंत. रा छ ६ सफर
छ ८ सफरी टप्यावर पुण्यास.

श्री.
भाद्रपद शु. १० रविवार शके १७१५.
----श्रीमंत राजश्री-----रावसाहेब-----
----स्वामीचे सेवेसीं------

विनंती. सेवक गोविंदराव कृष्ण कृतानेक सा नमस्कार, विनंती विज्ञापना. ता छ ८ माहे सफर मु बेदर येथें स्वामीचे कृपावलोकनें करून सेवकाचें वर्तमान यथास्थित असे विशेष. इकडील वर्तमान पेशजी छ. ६ माहे मारी लेखन करून पत्राची रवानगी डांकेवर केली तीं पत्रें सेवेसीं प्रविष्ट होऊन ध्यानांत आलें असेल. सांप्रत येथील वर्तमान अलाहिदा पुरवणीपत्रीं विनंती लि आहे. अलोकनें ध्यानास येईल. उत्तरें रवाना करावयास आज्ञा करणार स्वामी समर्थ सेवसीं श्रुत होय हे बिज्ञापना.