पत्र भीमराव संपत यांस                                                              लेखांक २१२.                                                      १७१५ वैशाख शुद्ध २.
छ १ सवाल.

राजश्रिया विराजित राजमान्य राजश्री भीमराव स्वामीचे सेवेसी-
पो गोविंदराव कृष्ण सां नमस्कार विनंति उपरि एथील कुशल जाणून स्वकीयें लिहीत जावें विशेष मरहूम नवाब रणमस्तखां बाहादूर याजकडून कर्जाऊ ऐवज येणे त्याचा फडच्या पेशजी मरहूम असतांच तुमचे मारफात ऐवजहि लाऊन दिल्हा एथून कोणी पाठवावा त्याचे पदरी ऐवज घालितो ऐसे तुह्मी लिा होते तुमचे लिहिण्याची खातरजमा त्यावरून राजश्री बालाजी व्यंकटेश यांस रवाना केले अलफखान बाहदूर यांनी आज आज उद्या यात्रा करून नंदपाळ वगैरे तालुक्यास जिकडे गेले तिकडे मारनिले ऐवजाकरितां च्यार महिने समागमे राहून सेवटी कांहीच नाहीं फिरोन आले त्यास इकडील दोस्ती घरोबा नवाबासी कसा हे इशापासोन अलफखान बाहदूर यांस तुह्मांस माहीत पुढेंहि मोठे कामाची उमेद त्यापक्षी खासगत कर्जाऊ ऐवजाची हे अवस्था यांत दोस्ती घरोब्यास लाजम की काय हे खान-बाहदूर यांस विचारावें आह्मीही त्यांस व रणदुलाखान यांजला पत्रे पाठविलीं आहेत देऊन ऐवजाचा फडच्या होय ऐसी तजवीज लौकर आमलात आणावी इकडील ऐवजाची काळजी व कळकळ तुह्मांस असावी याची तपसील ल्याहावा ऐसे नाहीं रवाना छ १ सवाल बहुत काय लिहिणे लोभ कीजे हे विनंति.