आदब [ आ + दभ् १० आज्ञापने { दभ् = दब् ( घोष लोप } ) दाबून धरणें. ( मान ह्या अर्थी अरबी आदब शब्द निराळा ).

आदळ [ आ + दृ ९ विदारणे { आदृ = आदर् = आदल् = आदळ }; आ = हा } ] आपटणें. इतर रूप- हादळ.

आदोळ [ आ + दुल् १० उत्क्षेपे ] झोके घेणें, हलणें. ( अदोळ पहा )

ई १ आधप् [ आ + ध्मापय् । ध्मा । ] होरपळणें.।
( आध्माप्यते = आधपे, आधपिजे । आध्मापितानि आधपिलीं, आधपलीं )

आधप [ आ + दह् १ ( णिच् ) ज्वलने दहापय् कर्मणि दहाप्यते ] होरपळणें. इतर रूपें -- अधप, आधाप.

आधाइ [ अधि + आ + ध्यै १ चिन्तायाम् ] आधिग्रस्त झालेला. ( अधाध पहा )

आधाध [ अधि + आ + ध्यै १ चिन्तायाम् ] आधिग्रस्त झालेला. ( अधाध पहा )

आधाधि [ अधि + आ + ध्यै १ चिन्तायाम् ] आधिग्रस्त झालेला. ( अधाध पहा )

आधाप [ आ + दह् १ ( णिच् ) ज्वलने { णिच् - दहापय - कर्मणि - दहाप्य - आधाप } ] होरपळणें. ( आधप पहा )

आधें १ [ आ + धे १ पाने ( आधाय्यम् ) { आधेय = आधे } ] पिण्याजोगें.
उ०-एरव्हीं त-हीं तूप काइसेयां गुसलावें।
अमृत कां गालुनु आधें करावें । हां गा पाउसीं काइ डावे ।
जेवणे आंग होये ॥ ज्ञा. १०-२९०

-२ [ आ + धे १ चोषणे आधेय ] चाटण्याजोगें, चोखण्याजोगें. उ०- वरील पहा.

आनंद [ आ + नंद् १० आनंदने ] आनंद, सुख होणें.

आप [ आप् ५ प्राप्तौ ] पावणें, प्राप्त होणें.

आपंग १ [ आ + पंगु ( ना. ) ] विकलित होणें.

-२ [ आ + प्र + अंग् १ गतौ ] एकाद्याच्या जवळ जाणें.

आपज १ [ आ + पद् ४ गतौ { आपद्यते - आपजे कर्मणि } ] मिळणें, प्राप्त होणें, उत्पन्न होणें, भासणें.

-२ [ आ + पद् ४ { आपद् नाम } ] संकट येणें.

आपदाव [ आपदा (ना.) { आपदाय = आपदाव } ] संकटांत असणें.

आपट [ आ + पट् १ विदारणे { आ = हा, सघोष स्वर } ] हापटणें, आदळणें.