पत्रांक ६२३

श्री.
१७२४ पौष शुद्ध ७

राजश्री नारायणराव गोसावी यांसीः-

अखंडितलक्ष्मीअलंकृत राजमान्य स्नो बाबुराव आंगरे वजारतमाब सवाई सरखेल रामराम विनंति उपरी येथील कुशल जाणून स्वकीय कुशल लिहित असावें. विशेष. राजश्री राऊ पंडित पंतप्रधान यांची स्वारी रेवदंडीयाहून वसईस गेल्या तागाईत, अलिकडे तुम्हांकडून पत्र येऊन तिकडील कांहीं समजत नाहीं. रेवदंडेचे मुकामीं भेट जाहली. तें समईं कित्येक बोलणीं चालणीं जालीं होतीं. त्यांतून तेथें गेल्यावर कोणकोणते बंदोबस्त कोणे त-हेचे कसे जाहले ते सविस्तर तपशील लेहुन कळवावें. त्यासारखें येथें विचार केले पाहिजेत. राजश्री राऊपंडित यांस पत्र लिहिलें आहे. त्याचेंही उत्तर घेऊन सत्वर पाठवावें. रा। छ ५ माहे रमजान, बहुत काय लिहिणें ? लाभ किजे. हे विनंति. मोर्तबसुद. शिका.