[२९]                                                                               श्री                                                                       २८ एप्रिल १७१५                                                         
                                                                                     श्रीमंत परमहंस भृगुनंदनस्वरूपेभ्यो स्वामीचे सेवेशी.

चरणरज बाळाजी विश्वनाथ नमस्कार. विनंति. अत्रत्य कुशल स्वामीचे आशिर्वादें त॥ वैशाख शु॥ सप्तमी रविवासर पावेतों मुक्काम किल्ले लोहगड यथास्थित जाणोन स्वकीय स्वानंद लेखनाज्ञा केली पाहिजे. विशेष श्रीचा एवज चिरंजीव राजश्री बाजीरायाकडून देवून हवाला घातला आहे. सांप्रत राजकीय लग्न प्रसंगामुळें वोढीचा अर्थ जाहला आहे, तो पत्री ल्याहावासा नाहीं. ऐशियास सांप्रत चिरंजिवाकडून ऐवज मोहरा २५ पंचीवस भानजी दळवी बराबरी रवाना करविला तो रवाना करतील तो घेऊन पावलियाचें आशीर्वादपत्र पाठविलें पाहिजे. बाकी ऐवजही सत्वरींच रवाना केला जाईल. श्रीचे कार्यास आह्मापासून अंतराई होणार नाही. विदित जाले पाहिजे. आह्मी स्वामीचे पदरीचे आहों. सर्व प्रकारें दया करून आशीर्वादपत्री परामर्ष घेत गेले पाहिजे. कृपा केली पाहिजे. सेवेशी विज्ञप्ति.