श्री.

लेखांक ८५.

१६८९ कार्तिक वद्य १२.

अखंडितलक्ष्मीअलंकृत राजमान्य राजश्री चिंतो विठ्ठल गोसावी यांसि:-
सेवक माधवराव बल्लाळ प्रधाननमस्कार उपरी येथील कुशल जाणोन स्वकीय लिहीत जाणें. विशेष. शिंदे येतात येतात ह्मणून तुह्मी बोलत गेला व त्याचीं ही पत्रें च्यार महिने येतों येतों ह्मणोन येतात; परंतु हा कालपर्यंत त्यांचे येणें होत नाहीं. कारभार तो जाला पाहिजे. हिंदुस्थानांत फौजा जाऊन बंदोबस्त व्हावा लागतो. त्याणीं विलंब लाविला तर कोठवरी वाट पहावी ? जरी आठा रोजांत सत्वर येत असिले तर उत्तम. यावें. नाहीं तरी करणें तसें करावें लागेल. जाणिजे. छ २९ जमादिलाखर, सु।। समान सितैन मया व अलफ. बहुत काय लिहिणें ? विसा दिवसांत त्यांनीं निघोन चालते व्हावें. तें जर जाहालें नाहीं. अद्याप निघावयाचें वर्तमान कळत नाहीं. यास्तव लवकर काय तें कळावें. दोहींकडून काम बुडवावें हें ठीक नाहीं. उत्तर रवाना सत्वर करणें. जाणिजे. छ मजकूर. बहुत काय लिहिणें ?

(लेखनसीमा.)