पत्रांक ३८.

श्री.
१६८८ श्रावण शुद्ध ५

राजश्रियाविराजित राजमान्य राजश्री बाबूराव कोनेर गोसावी यासीः-

पो माधवराव बल्लाळ प्रधान नमस्कार विनंति उपरी येथील कुशल जाणोन स्वकीय कुशल लिहित जाणे. विशेष. पत्र पाठविलें तें प्रविष्ठ जाहालें. व-हाडांतून येतां स्वामीचें दर्शन करून घरास यावें. त्यास मोंगलाचें सैन्य मध्यें होतें. यास्तव अनुकूल न पडलें-याचा अर्थ लिहिला तो सविस्तर कळला. घरीं गेली, उत्तम केलें ! तूर्त कांहीं नवीन प्रकार नाहीं. पुढे जसा प्रकार दृष्टीस पडेल तदनुरूप तुह्मांस लिहिले जाईल. जाणिजे, छ. ३ रबिलावल, सुा सबा सितैन मया व अलफ. बहुत काय लिहिणे हे विनंति.