पत्रांक १२८

श्री.
पौ चैत्र वा ११ गुरुवार
१६९६ चैत्र वद्य

सेवेसी विनंती ऐसीजे. पालखी तयार करविली आहे, तयार जाहाली, पाठवितों ह्मणून लिा त्यास, सरंजामसुद्धां आपली पांबडी येईल त्याबरोबर पा. येथे दुसरी करीत नाहीं. बेदाणा, मनोका, एक रुपयाच्या जासुदा समागमें पा. एक घोडा सिद्धच आहे, परंतु दुसरा मेळवून पाठवणें, ऐसें यांचें मानस, त्यास, दुसरा चांगला मिळत नाहीं. कारवानी आले होते. त्यांत पाहिले; परंतु आमचेच पसंतीस न ये. तेव्हां उपयोगी कैसा पडावा? यजमान तों पेंचामुळें संकोच्यांत पडतात. त्याशीं एकच पाठवावा. ऐसेंच वडिलांच्या विचारें जाहालें तरी लिहावें. तिकडील स्वार कोणी येतील त्यांस सांगावें. त्यां समागमें पाठवितील. गुंता नाहीं. हे विज्ञापना.