पत्रांक ६३

श्री.
१६९१ भाद्रपद वद्य १

सेवेसी हरी बल्लाळ कृतानेक साष्टांग नमस्कार विज्ञापना ता छ १५ जमादिलावल पावेतों मुक्काम मौजे तारगव्हासी पा पाथरी. वर्तमाने तर निजामअल्लीची पत्रें आलीं होतीं कीं, हिंदुस्थानची मसलत आहे, तर आपण पुढें बराणपूरपर्यंत जावें, आह्मीं मागाहून येतों. वकिलांचीं पत्रें आलीं जे, निजामअल्ली निश्चयें येतात, मुरादखान आले ह्मणजे येथून निघणार. त्यास, मुरादखान व कृष्णराव बल्लाळ लवकरच जाऊन पोंहचतील. हे तेथें गेलियावर पत्रें येतील ते स्वामीस लेहून पाठऊं. श्रीमंत नांदेड वसमत पर्यंत जाणार असें आहे. सेवेसीं श्रुत होय, हे विज्ञापना. तीर्थरूप राजश्री आबा लष्करांत आले आहेत. त्यांचे कामकाजाचा उलगडा लवकर होय, ते गोष्ट केली पाहिजे. हे विज्ञापना.