[ ५११ ]

श्री.

अखंडितलक्ष्मीअलंकृत राजमान्य राजश्री सदाशिव शामजी फडणीस प्रा। शिंगरुड गोसावी यासी:-

सो। बापूजी माहादेव व दामोदर माहादेव नमस्कार उपरि येथील क्षेम ता। छ १ जा।खर जाणून स्वकीय लिहिणें. विशेष. तुह्मी पत्र पाठविलें तें प्रविष्ट होऊन सकलार्थ अवगत जाला. ऐसियासि यादोरायाचें शांत जालियाचें वर्तमान कळोन परम चित्त विस्कळित जालें. बरे ! त्यासी तो समजून घेऊं परंतु आपलें हातचें माणूस गेलें हें खरें ! जें जालें त्याजला तो उपाय नाहीं. सांप्रत प्रा। मजकुरचें कामकाज तुह्मी व राजश्री त्रिंबकराव उभयतां एक विचारें करून करणें. जमीनदारांस वगैरे पत्रें जें पाठवणें तें मागाहून पाठवून देऊं. तुर्त प्रा। मजकुरीं विस्कळित न होता बंदोबस्त राखून सरकारचें कामकाज करीत जाणें. उभयतांहीं एकें चित्तें राहून प्रा। मजकूरचा बंदोबस्त करणें. वरचेवर वर्तमान लिहित जाणें. हे विनंति.